la duze Îsôt, la bêle.
si sang ir pasturêle,
ir rotruwange und ir rundate,
schanzûne, refloit und folate
wol unde wol und alze wol;
[...]
si sang in maneges herzen muot
offenlîchen unde tougen
durch ôren und durch ougen.
[...]
daz was ir süezez singen,
ir senftez seiten klingen,
daz lûte und offenlîche
durch der ôren künicrîche
hin nider in diu herze klanc.
sô was der tougenlîche sanc,
ir wunderlîchiu schoene,
die mit ir muotgedoene
verholne unde tougen
durch die venster der ougen
in vil manc edele herze sleich
und daz zouber dar în streich,
daz die gedanke zehant
vienc unde vâhende bant
mit sene und mit seneder nôt.

[Gottfried von Straßburg, Tristan, vv. 8075-79; 8116-18; 8121-8135]